විධායක ජනාධිපති ධුරය අහෝසි කිරීමට ‘ගෝටා කැමති නෑ’
පවතින දේශපාලන හා ආර්ථික අර්බුදයට විසදුම් සෙවීමට නම් විධායක ජනාධිපති ක්රමය අහෝසි කර පාර්ලිමේන්තු මැතිවරණයක් පැවැත්වීය යුතු බවට දෙමළ ජාතික සන්ධානය ආණ්ඩුවට යෝජනා කර තිබේ.
අගමැති මහින්ද රාජපක්ෂගේ ඇරයුමක් අනුව අප්රියෙල් 11 වැනිදා කොළඹ අරලිය ගහ මන්දිරයට පැමිණි දෙමළ ජාතික සන්ධානයේ මාධ්ය ප්රකාශක, පාර්ලිමේන්තු මන්ත්රී එම්.ඒ.සුමන්තිරන් මේ බව අවධාරණය කළේය.
අග්රාමාත්යවරයාගේ සම්බන්ධිකාරක මෙන්ම යාපනයේ දිස්ත්රික් සංවර්ධන කමිටුවේ අගමැති නියෝජිත වූ ද ගීතනාත් කාසිලිංගම් සංවිධානය කර තිබු මෙම හමුවේදී අගමැති ප්රකාශ කර ඇත්තේ සිය ධූර කාලය අවසන් වන තෙක් විධායක ජනාධිපතිධූරය අහෝසි කිරීමට ජනාධිපති ගෝථාභය රාජපක්ෂ අදහස් නොකරන බවයි.
“ජනතාව තෝරා පත් කරගත් අයෙක් ඒ දුන්නු ජනවරම අවසන් වූ පස්සෙයි අහෝසි කිරීම කරන්න ඕනෑ.“
අගමැති මහින්ද රාජපක්ෂගේ එම ප්රකාශයට විරෝධය දැක්වූ සුමන්තිරන් මන්ත්රී වරයා පෙන්වා දුන්නේ අද පවතින අර්බුදයට හේතු වී ඇත්තේ එම ජනවරම බවයි.
“ඒ ජනවරම දුන්නු ජනතාවම තමයි අද විදී බැහැලා ආණ්ඩුව ඉල්ලා අස්වෙන්න ඕනෑ කියලා කියන්නේ.දැන් ඒ ජනවරම අදාළ නැහැ.විධායක ජනාධිපති ක්රමය එක් දවසකින් අහෝසි කරන්න බැහැ.මාස කිහිපයක් ගතවේවි.“
“නිශ්චිත කාලයකින් විධායක ජනාධිපති ක්රමය අවසන් කරනවා කියලා ජනතාවට කියන්න ඕනෑ. ඊට පස්සේ කවුද පාලන බලය හොබවන්නේ කියලා පාර්ලිමේන්තු මැතිවරණයකින් ජනතාව තීන්දු කරාවි.” සුමන්තිරන් පැහැදිලි කරයි.
මේ සම්බන්ධයෙන් ජනාධිපතිවරයා සමග තව දුරටත් සාකච්ජා කර විසදුමකට එළඹෙන බවට අගමැතිවරයා සහතිකවී තිබේ.
දෙමළ ජාතික සන්ධානය හා ජනාධිපතිවරයා අතර පැවති සාකච්ජා ඉදිරියට ගෙන යාම ගැන අගමැති රාජපක්ෂ කළ විමසීමට පිළිතුරු දුන් සුමන්තිරන් කියා සිටියේ දෙමළ ජාතික සන්ධානයේ හවුල්කරුවන් අතර මත වෙනස්කම් තබා ගනිමින් ඊට එක්වූ බවයි.
"කතා බහේදී ඇති කරගත් එකඟතාවන් ඉටු කිරීමට ක්රියා කළහොත් ආණ්ඩුව කෙරෙහි දෙමළ ජනතාවට විශ්වාසයක් ඇතිවන බවයි.“
“දෙමළ දේශපාලන සිරකරුවන් නිදහස් කිරීම, දෙමළ - සිංහල අලුත් අවුරුද්දට පෙර කරන්න තිබුණා.ඒත් ඒක මග හැරියා. ඒ ගැන වැඩි අවධානයක් යොමු කරලා වෙසක් දිනයේදීවත් ඔවුන්ව නිදහස් කරන්න ඕනෑ.” ඔහු ඉල්ලයි.
