සිය ඉල්ලීම් ද ගාලුමුවදොර සටනට ඇතුල් කරගන්නා ලෙස උතුරේ අරගල කරන තරුණයෝ ඉල්ලති

සේයා - අන්තර්ජාලයෙන්

ජනාධිපතිවරයා ගෙදර යැවීම සදහා දකුණේ තරුණ තරුණියන් දියත් කර තිබෙන අරගලයට සහාය පළ කරන උතුරේ යෞවන යෞවනියෝ සිය ඉල්ලීම්ද කොළඹ සටනට ඇතුල් කරගන්නා ලෙස ඉල්ලා සිටී.

“දකුණේ ඉන්න අපේ සහෝදරයන්ට අපි කියන්නේ අපි ඔයගොල්ලෝ එක්ක මේ සටන ඉදිරියට ගෙනි යන්න කැමතියි. අපි ඔයගොල්ලන් එක්ක ඉන්නවා. නමුත් අපේ ප්‍රශ්න කීපයක් තියනවා. ඒවා ගැනත් ඔයගොල්ලන් අවධානය යොමු කරන්න ඕන කියන පණිවිඩය තමයි අද දින අපි ඔබතුමන්ලාට දෙන්නේ. “

දසවැනි දිනට ලඟා වෙමින් අඛණ්ඩව ගාලු මුවදොර වාඩිලාගත් ආණ්ඩු විරෝධී අරගලයට සහාය පල කරමින් අප්‍රේල් 17 වැනි ඉරිදා රාත්‍රියේ විලක්කු දල්වාගත් යාපනයේ සියගණනක් දෙමළ යෞවන යෞවනියන් පන්නෙයි පාලම අසල පෙළපාලියේ ගොස් ආණ්ඩුවට විරෝධතා දැක්වීමෙන් පසු ඔවුන් වෙනුවෙන් හඩ අවදි කළ ජනාධිපති නීතිඥ පාර්ලිමේන්තු මන්ත්‍රී එම්. ඒ සුමන්තිරන් එම ඉල්ලීම සිදු කළේය.

“වර්ග සංහාරයට යුක්තිය ඉටුකරනු” , “PTA අහෝසි කරනු”, “#GoHomeGota” යැයි හඬ නගමින් යාපනයේ තරුණ තරුණියන් විරෝධතාවය දියත් කර තිබුනි.

‘ගෝටාගෝගමේ’ සටනට දෙමළ දායකත්වය ප්‍රමාණවත් නැතැයි කියා ඇතැම් සිංහල මාධ්‍යවේදීන් සහ ක්‍රියාධාරීන් මැසිවිලි නගද්දී, දෙමළෙන් ජාතික ගීය ගායනා කිරීමට ගාලුමුවදොර දී හිමිනමක් දැඩි විරෝධය පලකරනු සමාජ මාධ්‍යවල අවධානය දිනාගෙන තිබුණි.

මේ වන විට රට මුහුණ දී සිටින ආර්ථික අර්බුදයට වඩා සිය ගුණයක් වැඩියෙන් උතුරු නැගෙනහිර ජනයා තිස් වසරකට වැඩි කාලයක් දුක් විදි බව දකුණට සිහිපත් කර දෙන පාර්ලිමේන්තු මන්ත්‍රී එම්. ඒ සුමන්තිරන් එහිදී අවධාරණය කළේ ඒ මොහොතේ දෙමළ ජනයා වෙනුවෙන් බහුතරය කතා නොකිරීම සම්බන්ධයෙන් ප්‍රශ්නයක් ඇතත් රාජපක්ෂවරුන් පලවා හැරීම වෙනුවෙන් දියත් කර තිබෙන සටන සමග අත් වැල් බැඳගන්නට උතුරේ තරුණ තරුණියන් මේ මොහොතේ කැමැති බවයි.

” අපේ සටන ඒකත් එක්ක එකතු කරලා තමයි අපිට ඉදිරියට යන්න පුළුවන්. “

ජනාධිපති නීතිඥ පාර්ලිමේන්තු මන්ත්‍රී එම්. ඒ සුමන්තිරන් දකුනේ තරුණ තරුණියන්ගෙන් එහිදි ඉල්ලා සිටියේ උතුරේ සටන් පාඨ දකුණේ තරුණයන් ඉදිරියට ගෙන යා යුතු බවයි.

” අපේ සටන ඔයගොල්ලන්‌ගේ අතට අරගෙන ඉදිරියට ගෙනියන්න ඕනේ කියන පනිවිඩය අද මේ තරුණයන් වෙනුවෙන් මම ඔයගොල්ලන්ට ප්‍රකාශ කරන්න කැමතියි. “

විරෝධතාවය සදහා දෙමළ ජාතික සන්ධානයේ හිටපු පළාත් සභා නියෝජිතයන් සහ ප්‍රාදේශිය සභා නියෝජිතයන් පිරිසක්ද එක්ව සිටි බව පළාත් බද වාර්තාකරුවෝ පවසති.

දින 1881ක් ඉක්මවූ අඛණ්ඩ විරෝධතාවක නියැලී සිටින උතුරේ අතුරුදහන් වුවන්ගේ ඥාතීහු කොළඹ අරගලයට හවුල් වීමට සැකමුසු බියක් පළකර තිබුණි.

ඔවුන් ප්‍රකාශ කර තිබුනේ ගාලු මුවදොරට දෙමළ දායකත්වයක් ලබාදීම ඒකීය රාජ්‍යය ශක්තිමත් කිරීමක් විය හැකි බවයි.

TheLeader

You may also like...

Leave a Reply

Your email address will not be published.

This site uses Akismet to reduce spam. Learn how your comment data is processed.