සංහිඳියාවාදී ලෙස පෙනී ඉඳිමින් ආණ්ඩුව ‘සිංහල බෞද්ධකරණයේ’
උතුරු, නැගෙනහිර දෙමළ ජනයාගේ සම්ප්‍රදායික සිද්ධස්ථාන ඉලක්ක කර සිංහල බෞද්ධකරණය සිදු කරන බවට ශිෂ්‍ය සංගමයක් ආණ්ඩුවට චෝදනා එල්ල කර තිබේ.
යාපනය විශ්ව විද්‍යාලය ඉදිරිපිට දී මාර්තු 19 වැනිදා උද්ඝෝෂණයක් දියත් කරමින් යාපනය විශ්වවිද්‍යාලයේ ශිෂ්‍ය සංගමයේ සභාපති කේ. තුවාකරන් අවධාරණය කළේ එම පහත් ක්‍රියාව වහාම නැවැත්විය යුතු බවයි.
“ඇත්තටම මේ ආණ්ඩුව දැන් උතුරු නැඟෙනහිර පළාත්වල සැලසුම් සහගත සිංහල බෞද්ධකරණයක් කරගෙන යනවා. ඒක අපි කවදාවත් පිළිගන්නේ නැහැ. ජාත්‍යන්තර ප්‍රජාවට සංහිඳියාවාදියකු ලෙස පෙනී සිට පිටරටින් හිඟාකමින් උතුරු-නැගෙනහිර දෙමළ ජනයාගේ සම්ප්‍රදායික සිද්ධස්ථාන ඉලක්ක කර සිංහල බෞද්ධකරණය නරකම ආකාරයෙන් සිදුකිරීම පහත් දෙයක්. මෙය වහා නැවැත්විය යුතුයි.”
වව්නියාව දිස්ත්‍රික්කයේ නෙදුන්කේනි ප්‍රදේශයේ වෙඩුක්කුනාරි කන්දේ පිහිටි ආදි ලිංගේස්වර කෝවිලේ මහා ශිව රාත්‍රී වන්දනා කටයුතු සිදු කරමින් සිටියදී මාර්තු 8 වැනිදා රාත්‍රියේ පොලීසිය විසින් හින්දු භක්තිකයන් අට දෙනකු අත්අඩංගුවට ගැනීම මෙම විරෝධයට ආසන්නම හේතුව වී තිබුණි.
අධිකරණ නියෝගයක් උල්ලංඝනය කරමින් හින්දු ආගමික වතාවත් පැවැත්වූ බවට චෝදනා කොට අත් අඩංගුවට ගෙන බන්ධනාගාර ගත කර සිටි හින්දු බැතිමතුන් පිරිසට එරෙහි චෝදනා ඔප්පු කිරීමට පොලිසියට කරුණු නොමැති වීමෙන් නඩුව නිෂ්ප්‍රභ කර ඔවුන් සියළු දෙනා නිදහස් කිරීමට වව්නියා දිසා විනිසුරු පෘත්වී සුබ්‍රමානියම් මාර්තු 19 වැනිදා නියෝග කළාය.
“සැලසුම් සහගත දෙමළ වර්ග සංහාරය අත් හිටවනු, වෙඩුක්කුනාරී අපේ සම්පතයි, උතුර සහ නැගෙනහිර දෙමළ ජනයාගේ නිජභුමියයි, මයිලත්තමඩු අපේ සම්පතයි, සිංහල බෞද්ධකරණය වහා නවත්වනු,” ආදී සටන්පාඨ පෙරටු කරගනිමින් ශිෂ්‍යයන් විරෝධතාවය දියත් කළ බව පළාත් බද වාර්තාකරුවෝ පවසති.
උතුරු, නැගෙනහිර දෙමළ ජනයාගේ සම්ප්‍රදායික සිද්ධස්ථාන ඉලක්ක කර සිදු කෙරන සිංහල බෞද්ධකරණය සම්බන්ධයෙන් දෙමළ දේශපාලන නායකයන් ද අවධානය යොමු කළ යුතු බව එහිදී පැවැසු ශිෂ්‍ය සංගම් නායක කේ. තුවාකරන් වැඩි දුරටත් අවධාරණය කළේ, දෙමළ ජනයාගේ භුමියෙහි බලහත්කාරයෙන් වාඩිලා සිටින හමුදාව වහාම ඉන් ඉවත් විය යුතු බවයි.
“හමුදාව අපේ ආගමික ස්ථාන, තණබිම්, කෘෂිකාර්මික ඉඩම් ඇතුළු සියල්ල අත්හැර යා යුතුයි. මේ රජය අපේ ජනතාවට තමන්ගේ ඉඩම්වල නිදහසේ ජීවත් වෙන්න අවස්ථාව සලසා දිය යුතුයි.”
පොලිසිය සහ පුරාවිද්‍යා නිලධාරීන් විසින් වෙඩුක්කුනාරි කන්දේ ආගමික වතාවත් පැවැත්වීමට බාධා කිරීම සම්බන්ධයෙන් විමර්ශනයක් සිදුකරන ලෙස ඉල්ලා යාපනය විශ්ව විද්‍යාල ශිෂ්‍ය සංගම් නායකත්වය ශ්‍රී ලංකා මානව හිමිකම් කොමිසමට පැමිණිල්ලක්ද ගොනුකර තිබේ.
