ශ්රී ලංකාව ‘අපරාධකාරී හමුදාවන්ට දණ්ඩ මුක්තිය ඇති රටක් ‘ සන්ධ්යා එක්නැලිගොඩ ජිනීවාහිදී
ශ්රී ලංකාව අපරාධකාරී හමුදාවන්ට දණ්ඩ මුක්තිය ඇති රටක් බව අතුරුදහන් සැමියා වෙනුවෙන් නොසැලෙන අරගලයක යෙදීම නිසා ගෞරව පිණිස ජගත් සම්මානයෙන් පුද ලද මානව හිමිකම් ක්රියාකාරිනියක් ජාත්යන්තරය හමුවේ පවසා තිබේ.
” අද ඔබ දකින මාගේ මුඩු කළ හිස සහ කළු වස්ත්ර ඔබට ගෙන එන පනිවිඩය මා එන්නේ අපරාධකාරී හමුදාවන්ට දණ්ඩ මුක්තිය ඇති වින්දිතයෙක්ට යුක්තිය නැති රටක සිට බව “
යුක්තිය සොයා අඛණ්ඩව දොලොස් වසරකට අධික කාලයක් තිස්සේ අරගලයේ යෙදී සිටින සන්ධ්යා එක්නැලිගොඩ සිංහල බසින් ඒ බව සදහන් කළේ ජිනීවා නුවර එක්සත් ජාතීන්ගේ ඉහල පෙලේ සැසිවාරයක් අමතමිනි.
බලහත්කාරයෙන් අතුරුදහන් කර සිටින තම පෙම්බර සැමියා වන මාධ්යවේදී ප්රගීත් එක්නැළිගොඩ වෙනුවෙන් යුක්තිය සොයා ගැනීම සදහා සෑම දිනක්ම අලුත් වන හා නිම නොවන සටනක යෙදීමට සිදුව තිබෙන බව සදහන් කළ සන්ධ්යා එක්නැලිගොඩ එහිදී උතුරේ මව්වරුන්ගේ නොනිමි අරගලය සම්බන්ධයෙන්ද සිය හඩ අවදි කළාය.
” මම වගේම අතුරුදහන් වු තමන්ගේ ආදරනියන් සොයන සිංහල , දෙමළ, මුස්ලිම් මව්වරු රට පුරාම ඉන්නවා.ඉන් නොවනතින අරගල කරන්නේ උතුරේ දෙමළ මව්වරුන්.ඔවනුත් මම වගේම පොලීසිය වැනි බොහෝ රාජ්ය අයතන සමග ගැටෙනවා,” යි බලහත්කාරයෙන් අතුරුදහන් කිරීම් සම්බන්ධ එක්සත් ජාතීන්ගේ කමිටුවේ 23 වැනි සැසිවාරය අමතා සන්ධ්යා පැවසුවාය.
ගෙවී ගිය දශක හතර තුළ බොහෝ කොමිෂන් පත්කළත් කිසිම කොමිසමකින් අතුරුදහන් වුවන්ට හෝ පවුල් වල අයට යුක්තිය ලැබී නොමැති බව ජාත්යන්තරය හමුවේ යළිත් සිහිපත් කළ ඇය තවදුරටත් සදහන් කළේ තම ආදරණීයයන්ගේ පින්තුරයක් තුරුළු කරගෙන උතුරේ මව්වරු 130 ක් පමණ මේ වන විටත් මිය ගොස් ඇති බවයි.
සත්ය සහ යුක්තිය ඉටු කරගත හැකි වින්දිතයන්ට විශ්වාස කළ හැකි නෛතික යාන්ත්රණයක් ලබා ගැනීමට මැදිහත් වන ලෙස සන්ධ්යා එක්නැලිගොඩ දෙදරු මාතාව එජා කමිටුවෙන් ඉල්ලා සිටියාය.
12 වසරක නොනිමි අරගලය
මාධ්යවේදී ප්රගීත් එක්නැලිගොඩ බලහත්කාරයෙන් අතුරුදහන් කර තිබුනේ 2010 ජනවාරි 24 දාය.
ශ්රී ලංකාවේ යුද්ධයෙන් ද ඊට පෙර කැරලි වලින්ද අතුරුදහන් දහස් සංඛ්යාත ජනකායකගේ ඥාති සමුහයාගේ සංකේතයක් බවට පත්වූ කාන්තාවක් ලෙසින් සන්ධ්යා එක්නැලිගොඩ එක්සත් ජනපද ජගත් දිරිය කත සම්මානයෙන් 2017 වසරේදී පුද ලද්දීය.
සම්මානය සඳහා ඇය තෝරාගැනීමට හේතු පාදක වූයේ අතුරුදහන් සිය සැමියා ප්රගීත් එක්නැලිගොඩ සම්බන්ධ සත්යය හෙළි කරගැනීමට බාධා පෑ බලධාරීන්ගේ අවහිර නොතකා අසූ වතාවකට වඩා උසාවි ගානේ යමින් සන්ධ්යා විදහා දැක්වූ ධෛර්යය බව ඇමරිකා එක්සත් ජනපද සහකාර රාජ්ය ලේකම් තෝමස් ඒ ෂැනොන් විසින් ප්රකාශ කර තිබුනි.
