‍ප‍ො‍හ‍ොට්ටු වි‍ර‍ෝධය මැද පාර්ලිමේන්තුවේ මුල්ලිවයික්කාල් සමරුවක්

මුල්ලිවයික්කාල් ජන සංහාරයේදී මරා දැමුවන් සිහිපත් කරමින් ගෝඨාභය-රනිල් ආණ්ඩු පාර්ශවයේ විරෝධය මැද පාර්ලිමේන්තුවේ විනාඩියක නිහැඬියාවක් පවත්වා තිබේ.

දෙමළ ජාතික සන්ධානයේ පාර්ලිමේන්තු මන්ත්‍රී විනෝ නෝහරාදලිංගම් ඊයේ [18] දිනයේ සිය කතාව ආරම්භ කරමින් ඉල්ලා සිටියේ මුල්ලිවයික්කාල් වර්ග සංහාරයේ දී මරා දැමුණු ජනතාව වෙනුවෙන් විනාඩියක නිහැඬියාවක් රකින ලෙසයි.

අනතුරුව ශ්‍රීලංකා පොදුජන පක්‍ෂය නියෝජනය කරන මන්ත්‍රීවරු නැගී සිටිමින් ඊට විරෝධය දක්වන්නට වූහ.

මිනිත්තුවක් නිශ්ශබ්දව පැවැත්වූ සැමරුම මුල්ලිවයික්කාල් කොටින් වෙනුවෙන් කරන ලද්දක් ලෙස හඳුන්වමින් එය හැන්සාඩ් වාර්තා වලින් ඉවත් කරන ලෙසයි එම මන්ත්‍රීවරුන් මුලාසනයෙන් ඉල්ලා සිටියේ.

ඒ ගැන තීරණයක් ගැනීමට කතානායක මහින්ද යාපා අබේවර්ධන වෙත යොමු කරන බවට මුලාසනයෙන් දැනුම් දීමත් සමගින් මන්ත්‍රී නෝහරාදලිංගම් සිය කතාව යළි ඇරඹීය.

පසුව සභාව ඇමතූ දෙමළ ජාතික සන්ධානයේ පාර්ලිමේන්තු මන්ත්‍රී චාර්ල්ස් නිර්මලනාදන් මුල්ලිවයික්කාල් ප්‍රකාශනය කියවන්න්නට විය.

වර්ග සංහාර අනුස්මරණ කමිටුවේ විශේෂ ඉල්ලීමක් මත එය ඉදිරිපත් කරන බව පැවසූ මන්ත්‍රී නිර්මලනාදන් කියා සිටියේ ලංකාවේ දෙමළ ජනතාවගේ දුක්බරම දිනය මැයි 18 වැනිදාට යෙදෙන බවයි.

මේ දිනය අපේ භුමිය මාරුවෙන් මාරුවට ආක්‍රමණය කළ සිංහල ආණ්ඩුවේ වර්ග සංහාරයන් පිළිඹිබු කරනවා. කෙතරම් දුකක්, කම්පනයක්, පීඩනයක් දැනුනත් අපි පරාජය වෙන්නේ නැහැ. මුල්ලිවයික්කාල් භූමියේදී මරා දැමුණු ලක්ෂ ගානක් අහිංසක දෙමළ ජනයා සිය ජිවිත පරිත්‍යාග කළේ අපි වෙනුවෙන්. යුද්ධයෙන් පසුවත් දෙමළ ප්‍රදේශවල අපේ ඥාතීන් අතුරුදහන් කළා.ආණ්ඩුවේ හමුදාවට බාර කරපු අපේ ඥාතීන් තවම හමුවුනේ නැහැ.දිගින් දිගටම උද්ඝෝෂණය කළත්,මේවන තුරු කිසිදු ප්‍රථිපලයක් නැහැ.

දෙමළ ජනතාවගේ වේදනාව හඳුනාගෙන ඔවුන්ට යුක්තිය ලබා ගැනීම සඳහා ගෙනයන අරගලයට සහාය දෙන ලෙස මන්ත්‍රීවරයා සිංහල ජනතාවට ආයාචනයක්ද කළේය.

මුල්ලිවයික්කාල් සමරු ස්මාරකය අසල මෙන්ම, යාපනය සරසවිය, වවුනියාව, කිළිනොච්චිය, මන්නාරම, ත්‍රිකුණාමලය, මඩකළපුව සහ පුදිකුඩිඉරිප්පු, වවුනියාව අතුරුදහන් කළවුන්ගේ ඥාතීන්ගේ අරගල බිමේ මෙන්ම ගාලු මුවදොර ගෝ ගෝටා ගෝ හෝම් ගමේ ද මුල්ලිවයික්කාල් ජන සංහාරයෙන් මළවුන් සිහිපත් කෙරිණි.

TheLeader

You may also like...

Leave a Reply

Your email address will not be published.

This site uses Akismet to reduce spam. Learn how your comment data is processed.