ලංකාවේ ආර්ථික අහේනියේ වැඩිම බර දරුවන්ට: එක්සත් ජාතීන්

School kids, end of the day Sri Lanka
සේයා අන්තර්ජාලයෙන්

රට මුහුණ දී සිටින ආර්ථික අර්බුදය හමුවේ දරුවන්ට ප්‍රධාන කෑම වේල හෝ සපයා දිය නොහැකි තත්වයකට දෙමාපියන් පත්ව සිටින බව අනාවරණය කරන එක්සත් ජාතීන්ගේ නවතම වාර්තාවක් මගින් උග්‍ර මන්දපෝෂණය අතින් දැනටමත් දකුණු ආසියා කලාපයේ ඉහළම ස්ථානයක ශ්‍රී ලංකාව රැදී සිටින බව පෙන්වා දී තිබේ.

එක්සත් ජාතීන්ගේ ජාත්‍යන්තර ළමා අරමුදලේ (UNICEF) දකුණු ආසියානු කලාපීය අධ්‍යක්ෂ ජෝර්ජ් ලැරියා-ඇඩ්ජේ පසුගියදා මෙරට සංචාරයක නිරතවීමෙන් පසු නිකුත් කළ වාර්තාවක් මගින් අනතුරු අඟවා ඇත්තේ ආර්ථික කම්පනය ශ්‍රී ලංකාව දිගින් දිගටම අවුල් කරද්දී, එහි වැඩිම මිල ගෙවන්නේ දුප්පත්ම හා වඩාත්ම අවදානමට ලක්විය හැකි ගැහැනු ළමයින් සහ පිරිමි ළමයින් බවයි.

ශ්‍රී ලංකාවේ ආර්ථික අර්බූදය නිසා පවුල් ජීවිත ගැට ගසා ගැනීමේ අපහසුතා වර්ධනය වෙමින් තිබෙන බව සඳහන් කරන දෙන ඔහු තව දුරටත් පෙන්වා දෙන්නේ තමන්ගේ මීලග ආහාර වේල ලැබෙන ස්ථානය සම්බන්ධයෙන් ශ්‍රී ලංකාවේ දරුවන් පිරිසක් අවිනිශ්චිත තත්වයක පසුවන බවයි.

“ප්‍රධාන ආහාර ද්‍රව්‍ය වල මිල දැරිය නොහැකි වීම නිසා පවුල් මුලික ආහාර වේල් ප්‍රමාණය මඟහරිමින් සිටිනවා. දැනටමත් දකුණු ආසියාවේ දෙවැනි ඉහළම උග්‍ර මන්දපෝෂණය ඇති රටක – තමන්ගේ මීළඟ ආහාර වේල ලැබෙන්නේ කොතැනින්දැයි යන්න අවිනිශ්චිතවයි දරුවන් කුසගින්නේ නින්දට යන්නේ.”

දිනෙන් දින ඉහල යන ආර්ථික පිඩනය හමුවේ ළමයින් මුහුණ දී සිටින තවත් ගැටළු කිහිපයක් ඔහු සිය වාර්තාව මගින් අවධානයට ලක් කර තිබේ.

“වැඩිවෙන ආර්ථික පීඩනය හේතුවෙන් ළමයින්ට එරෙහි අපයෝජන, සූරාකෑම් සහ ප්‍රචණ්ඩත්වය වැඩිවීම පිළිබඳ තවත් වාර්තා දැනටමත් මතුවෙමින් තිබේ. ප්‍රධාන වශයෙන් දරිද්‍රතාවයේ ප්‍රතිඵලයක් ලෙස ශ්‍රී ලංකාව තුළ දැනටමත් 10,000 කට අධික ළමුන් සංඛ්‍යාවක් ආයතනික රැකවරණයේ සිටිති. පවුලක බැඳීමෙන් පිටමංකරනු ලබන නිසා එවැනි ආයතන දරුවකුට හැදී වැඩීමට හොඳම ස්ථාන නොවේ. නමුත් පෝෂණය කිරීම ඇතුළු අවශ්‍යතා සපයාදීමට නොහැකි බැවින් වත්මන් අර්බුදය තම දරුවන් මෙම ආයතනවලට රැගෙන යාමට වැඩි වැඩියෙන් පවුල් පොළඹවනු ලබයි.”

තත්වය තවදුරටත් පැහැදිලි කරන ලැරියා-ඇඩ්ජේ පෙන්වා දෙන්නේ ආර්ථික අර්බුදය ශ්‍රී ලංකාවේ දරුවන්ගේ අධ්‍යාපනයටත් දැඩි බලපෑම් එල්ල කර තිබෙන බවයි.

“ශ්‍රී ලංකාවේ ළමුන්ගෙන් අඩකට පමණ දැනටමත් ඒ හෝ මේ ආකාරයේ හදිසි ආධාර අවශ්‍ය වේ. වසර දෙකක් තිසේසේ ඉගෙනීම බාධා ඇතිකිරීම් හේතුවෙන් දැනටමත් දැඩි ලෙස අඩාල වී ඇති මිලියන 4.8 ක ළමුන්ගේ අධ්‍යාපනය, පාසල් පැමිණීම දිගින් දිගටම උවදුරට ලක්ව තිබීමෙන් අවදානම්කාරී වී ඇත. වත්මන් අර්බුදය නිසා දරුවන්ගේ අධ්‍යාපනයට බොහෝ පැතිවලින් බාධා එල්ල වෙමින් පවතී – අර්බුදයට පෙර ඔවුන්ට තිබූ උණුසුම් සහ පෝෂ්‍යදායී ආහාර වේලක දරුවන්ට තවදුරටත් නොලැබෙයි. ඔවුන්ට මූලික ලිපි ද්‍රව්‍ය නොමැති අතර, ඔවුන්ගේ ගුරුවරුන් මගී ප්‍රවාහන ප්‍රශ්න සමඟ අරගල කරති.”

ශ්‍රී ලංකාවේ අධ්‍යාපන වෘත්තිකයන්ගේ ප්‍රධානතම සංගමය පෙන්වා දෙන්නේ මෙරට පාසල් දරුවන් ලක්ෂ 43 න් ලක්ෂ 11 කට පාසල් දිවා ආහාර වැඩසටහනක් ක්‍රියාත්මක වුවද ඒ සඳහා එක් දරුවකුට වෙන්කරන මුදල බිත්තරයක මිල දක්වා පහත දමා ඇති බවයි.

“පාසල් දරුවන් ලක්ෂ 43 ක් සිටින අතර, ඉන් ලක්ෂ 11 කට පාසල් දිවා ආහාර වැඩසටහනක් ක්‍රියාත්මක වුවද ඒ සඳහා ලබාදෙන මුදල රු.30/- ක් වීම තුළ එය සම්පූර්ණයෙන්ම ව්‍යාකූල වී තිබුණි. මේ වන විට එය රු.60/- ක් දක්වා වැඩි කර තිබුණ ද බිත්තරයක මිල ම රු.60/- කට වඩා මේ වන විට ඉහළ ගොස් ඇත. පවතින ආර්ථික උද්ධමනය හමුවේ එම මිලට දරුවන්ට පෝෂ්‍යදායී ආහාර වේලක් ලබා දිය නොහැකි තත්වය තුළ ආහාර සැපයුම්කරුවන් හා පාසල් අතර, අදාළ ගිවිසුම් වලට එළඹීම සිදු නොවීමෙන් මේ වන විට එම දිවා ආහාර වැඩසටහන බරපතල අර්බුදයක පවතී,” යි පුවත්පත් නිවේදනයක් නිකුත් කරමින් ලංකා ගුරු සංගමයේ ප්‍රධාන ලේකම් ජෝසප් ස්ටාලින් පවසා තිබුණි.

UNICEF දකුණු ආසියානු කලාපීය අධ්‍යක්ෂ ජෝර්ජ් ලැරියා-ඇඩ්ජේ සිය වාර්තාවේ වැඩි දුරටත් සදහන් කර ඇත්තේ “ශ්‍රී ලංකාවේ මා දුටු දෙය දකුණු ආසියාවේ අනෙකුත් රටවලට අනතුරු ඇඟවීමකි.” බවයි.

“දකුණු ආසියාව හරහා පැතිරයන උග්‍ර ආර්ථික අවදානම සහ උද්ධමනය දරුවන්ගේ ජීවිත තවදුරටත් තර්ජනයට ලක් කිරීමට සූදානමින් සිටී. ඒ ළමා සෞඛ්‍යයට, අධ්‍යාපනයට හා ආරක්ෂාවට බලපාන අන්ත දුගීභාවය, ගැඹුරු දුෂ්කරතා සහ අසමානතාවයන් ලෝක මට්ටමින් ගත් කල ඉන් පහෙන් එකකට මේ දකුණු ආසියානු කලාපය දැනටමත් නිවහන වී ඇති තතු යටතේ ය.”

තමන්ගේ නිමැවුමක් නොවන අර්බුදයක් වෙනුවෙන් විපාක විඳවීමට දරුවන්ට ඉඩහැර සිටීමට නොහැකි අතර ඔවුන්ගේ හෙට දවස සුරක්ෂිත කිරීමට අදම ක්‍රියා කළ යුතු බව ජෝර්ජ් ලැරියා-ඇඩ්ජේ සිය වාර්තාවේ අවසානයේ වැඩි දුරටත් සදහන් කර තිබේ.

You may also like...

Leave a Reply

Your email address will not be published.

This site uses Akismet to reduce spam. Learn how your comment data is processed.