PTA ත්රස්ත නීතියෙං 100කට වැඩිය හිරේ
ලංකාව තුළ අඩුම වශයෙන් පුද්ගලයන් 129 දෙනකු ත්රස්තවාදය වැලැක්වීමේ පනත යොදාගෙන සිරගත කොට සිටින බව හෙලිවී තිබේ.
මේ අතරින් 125 දෙනකුම සිටින්නේ රිමාන්ඩ් බන්ධනාගාරයේ බව ශ්රී ලංකා පොලිසිය විසින් තොරතුරු දැනගැනීමේ අයිතිවාසිකම පිළිබඳ කොමිෂන් සභාවේ නියෝගයෙන් ලබා දී ඇති තොරතුරුවල දැක්වේ.
ත්රස්තවාදය වැලැක්වීමේ පනත (PTA) යටතේ රඳවා ගෙන සිටින සංඛ්යාව පිලිබඳ විස්තර ලබාදෙන ලෙස තොරතුරු දැනගැනීමේ අයිතිය යටතේ 2021 ජූලියේ කරන ලද ඉල්ලීමක් පොලිසිය විසින් ප්රතික්ෂේප කරන ලද පසු,යහපාලන ආණ්ඩු සමයේ හිටපු මානව හිමිකම් කොමසාරිස් අම්බිකා සත්කුනනාදන් නීතිඥවරිය විසින් කරන ලද අභියාචනයකින් අනතුරුව ඔක්තෝබර් 26 දා කොමිසම දුන් නියෝගයෙන් ත්රස්ත විමර්ශන ඒකකයට එම තොරතුරු අනාවරණය කරන්නට සිදුවී ඇත.
වැඩිම පිරිසක් රඳවාගෙන සිටින්නේ පාස්කු බෝම්බ ප්රහාරය ගැන සැකයටය. ඒ ගණන 81 කි. ඉන් 42ක් මහාධිකරණය විසින් ද 39ක් මහේස්ත්රාත් අධිකරණය විසින්ද රිමාන්ඩ් ගත කරන ලද්දවුන්ය.
දෙමළ ඊළම් විමුක්ති කොටි සංවිධානය හා සම්බන්ධ බවට සැකයට 44 දෙනකු අධිකරණ නියෝගයෙන් රිමාන්ඩ් භාරයේ තබාගෙන සිටින බවද පොලිසිය දැනුම් දී ඇත.
අධිකරණ නියෝගයකින් තොරව දෙදෙනකු රඳවාගෙන සිටී. එක් අයකු පාස්කු ප්රහාරය සම්බන්ධයෙනි. අනෙකා එල්ටීටීඊය හා සම්බන්ධ බවට සැකයටය.
කෙසේවෙතත්, පොලිසිය දක්වන ගණන් හිලව් හා බන්ධනාගාර සංඛ්යාලේඛන අතර පරස්පරයක් ඇති බව හිටපු මානව හිමිකම් කොමසාරිස්වරිය පවසන්නීය .
“2021 අගෝස්තුවේ බන්ධනාගාර සංඛ්යාලේඛන දෙපාර්තමේන්තුවට අනුව LTTE හා සම්බන්ධ වැරදිවලට දඬුවම් ලබන සංඛ්යාව 24කි. රිමාන්ඩ් භාරයේ 85කි. පාස්කු ප්රහාරයට රිමාන්ඩ් භාරයේ 205 දෙනෙකි. PTA යටතේ එවක රිමාන්ඩ් කර සිටි සංඛ්යාව 298කි,” යි නීතිඥ අම්බිකා සත්කුනනාදන් සමාජ මාධ්ය ඔස්සේ ප්රකාශ කර තිබේ.
ඉන් පසුව බොහෝ දෙනා ඇප මත මුදා හැර ඇති බවත් ඇය කියා සිටී.
ත්රස්ත නීති යොදාගෙන පාස්කු ප්රහාරයට සැකපිට සිය ගණනක් අත් අඩංගුවට ගන්නා ලද්දේ ආචාර්ය දීපිකා උඩගමගේ නායකත්වයෙන් යුත් ශ්රී ලංකා මානව හිමිකම් කොමිසමේ කොමසාරිස්වරියක් ලෙසින් නීතිඥ සත්කුනනාදන් රාජකාරි කරද්දී ය.
සිංහල නොවන ජාතීන් මර්දනයට යොදාගන්නා බිහිසුනු නීතියක් ලෙසින් ගර්හාවට ලක්ව ඇති PTA පනත දකුණේ මෑත කතාබහට ලක්වුණේ වසන්ත මුදලිගේ සහ ගල්වැව සිරිධම්ම හිමි යන ශිෂ්ය නායකයන් දෙදෙනා අත් අඩංගුවට ගැනීමත් සමගය.
