උතුරේ මහවිරු සැමරුම් සූදානමට ශ්‍රී ලංකා යුද හමුදාවෙන් බාධා
යුද්ධයේදී ඝාතනයට ලක්වු එල්.ටී.ටී ඊ සාමාජිකයන් මිහිදන් කර තිබෙන උතුරේ සුසාන භුමියක් ඉදිරිපිට මාර්ගය එළිපෙහෙළි කරමින් මහවිරු දිනය සැමරීමට සුදානම් වන දෙමළ ජාතික ජනතා පෙරමුණේ ක්‍රියාධරයන් පිරිසකට යුද හමුදාව බාධා පමුණුවා තිබේ.
නොවැම්බර් 27 වැනිදාට යෙදී තිබෙන දෙමළ මහවිරු දිනය ඉලක්ක කරගනිමින් නොවැම්බර් 2 වැනි බදාදා යාපනය, කෝපායි සුසාන භුමිය ඉදිරිපිට මාර්ගය ශ්‍රමදානයෙන් සුද්ද පවිත්‍ර කිරීමේ කටයුතු සිදුකළ බවයි පළාත් බද වාර්තාකරුවන් පවසන්නේ.
දෙමළ ජාතික ජනතා පෙරමුණේ නියෝජ්‍ය නායක පාර්ලිමේන්තු මන්ත්‍රී සෙල්වරාසා ගජේන්ද්‍රන් ඇතුළු පිරිසක් වැසි මධ්‍යයේ පිරිසිදු කිරීමේ කටයුතු වල නිරතව සිටියදී එම ස්ථානයට පැමිණි හමුදා සෙබළුන් ඔවුන්ට පවසා ඇත්තේ පිරිසිදු කිරීමේ කටයුතු නතර කරන ලෙසයි.
එම අවස්ථාවේ යුද හමුදා සෙබළුන් සුසාන භුමය ඉදිරිපිට මාර්ගයේ බෞද්ධ කොඩි සවි කිරීමට කටයුතු කරන ආකාරය යාපනයේ මාධ්‍යවේදීන්ගේ කැමරා කාචයට හසුව තිබේ.
යුද හමුදාව විසින් සිදු කරන බාධා කිරීම් සම්බන්ධයෙන් දෙමළ ජාතික ජනතා පෙරමුණ විසින් ඒ මොහොතේ කෝපායි පොලිසියට පැමිණිලි කර තිබෙන අතර පොලිස් නිලධාරීන් එම ස්ථානයට පැමිණිමත් සමග යුද හමුදා කදවුරේ නිලධාරීන්ද එම ස්ථානයට පැමිණි අතර හමුදා සෙබළුන්ට එම ස්ථානයෙන් ඉවත් වන ලෙස ඔවුන් නියෝග කළ බව පළාත් බද වාර්තාකරුවෝ වැඩි දුරටත් පවසති.
කෝපායි මහවිරු සොහොන රජයේ හමුදා විසින් විනාශ කර දමා ඒ මත දැවැන්ත හමුදා කඳවුරක් ඉදිකරන්නට රාජපක්‍ෂ ආණ්ඩුව කටයුතු කළේ මිට වසර කිහිපයකට පෙරය.
ඉන්පසු සෑම වසරකම කෝපායි හමුදා කඳවුර ඉදිරිපිට පෞද්ගලික ඉඩමක මහවිරු සැමරුම පැවැත්විණි.කෝපායි මහවිරු සැමරුම සදහා සුදානම් වීමට ශ්‍රමදානයේ යෙදුනු පිරිසකට රජයේ ආරක්ෂක අංශ පසුගිය වසරේද මේ අයුරින්ම බාධා එල්ල කර තිබුනි.
හමුදා භටයන් විසින් ශ්‍රමදානයේ යෙදුනු පිරිස ජංගම දුරකථන මගින් ජායාරුප ගත කරමින් බිය වැද්දීමට උත්සාහ කළ බවටත් ශ්‍රමදානයට එක්ව සිටි පිරිස් පවසති.
ඝාතනයට ලක්වු හිටපු එල්.ටී.ටී.ඊ සාමාජිකයන් 7000 ක් පමණ මිහිදන් කර තිබෙන තේරාවිල් සුසාන භුමියට එක්වු ඔවුන්ගේ පවුල් වල සාමාජිකයන් සහ ගම්වැසියන් පසුගිය සතියේ එම සුසාන භුමිය පිරිසිදු කිරීමේ කටයුතු වල නිරතව සිටියදී ද ඔවුන් ද වීඩියෝ ගත කරමින් හමුදා සෙබළුන් බියවද්දන සුළු ආකාරයෙන් කටයතු කළ බව ප්‍රදේශවාසීහු පවසති.
